صدى الزواقين Echo de Zouakine
مرحبا بك عزيزي الزائر. المرجو منك أن تعرّف بنفسك و تدخل المنتدى معنا ...اذا لم تكن قد تسجلت بعد نتشرف بدعوتك للتسجيل في المنتدى.

عداوي / تأليف: شكيب عبد الحميد . الاتحاد الاشتراكي

استعرض الموضوع السابق استعرض الموضوع التالي اذهب الى الأسفل

عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 15:26

1 ... اكتشافات آدم

دابا نبداو من الأول من أول الدنيا من بداية المحنة ديالنا ملي جينا للدنيا.
بداية السقوط La chute. الزلكة الأولى، طحنا من الفوك، خرجنا من الجنة.
بونا آدم وامنا حوا خرجو الله كريم. زبطين، حينت ماكانوش المايوات ديك الساعة.
اكتشفو عورتهم.
أدم اكتشف العورة والعورة اكتشفت أدم.
حوا خرجت من أدم، كيكولو من ضلعتو،
المهم خرجت منو، منين خرجت ما عندنا عرض.
توضرو فالدنيا.
أدم كان كيبحث على حوا في النهار وينعس بالليل.
حوا كتبحث بالليل والنهار ولما تلاقاو كالت ليه:
هذي هي بلاصتي ما تحركت ما تململت.
شفتو أول كذبة فالتاريخ.
اكتشفو العورة، عورها أو عوراتو، تعاورو مع بعضياتهم في الخلا ما كاين لا رقيب ولا حسيب ولا فاركونيت.
نتيجة هاذ التعاوير ولدو قابيل وهابيل وجوج بنات.
قابيل وهابيل ومن بعد ولى وائل، مارسيل، ميكائيل. عادل
المهم ما عندنا عرض.
أدم كان عاوحدو فالدنيا كيدردك، كلشي ديالو، الوطى والجبال، كيدردك كما بغى، أرض الله واسعة بر وبحر أوكان إلا احتاج لشي حاجة Urgente كيركب على موطور ويطير يجيبها ويجي مكان لا فوروج ولا زحام ولا والو، وحدو فوق الموطور منوض الغبارة عان عان عان عـــــــــــــان...
كبر قابيل وهابيل، جا وقت التعاوير، هابيل بغى مرت قابيل تزايدو في الهضرة مني منك، مني منك، جبد هابيل الموس وغرسو فظهر خوه.
الموس منين جاه؟
الموس شراه من عند واحد ليهودي شارف كان قبل بونا أدم ساكن فواحد البريريكة.
جا الليل أوطاح الظلام والتخشخيش والبرد، بونا أدم خرج يفتش على اولادو هاز معاه بيل فيدو وكايفتش، مالقاش اولادو فالبلاصة، شير على طاكسي أومشى الكومسارية ديكلارا.
أتا أنا اسير نكول؟ كان شي طاكسي أولا كومسارية داك الوقت.
المهم ما عندنا عرض.
نبداو من الأول.
أدم كان وحدو Seul au monde بحال طوم هانكس، ديك الساعة طوم هانكس كان باقي صغير أولا باقي مادزادش. ماعرفت.
ما عندنا غرض.
أدم وحوا وحدهم في الدنيا، تعلمو يزرعو، يحرثو، يبنيو فين يسكنو. ما كاين لا طريطات ولا بيت الكرا ولا الحكم بالإفراغ ولا هم يحزنون والو عا الخلا والقفار، كانوا وحدهم مع الوحوش والطيور والهوا نقي والجبال. كان غير ليهودي الشويرف مونسهم بواحد الرويديو ديال الحجرة قديم خلاتو ليه عمتو شراتو من عند واحد الشينوي كان عا دايز.
المهم ما عندنا غرض.

06 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 15:32

2 ... آدم والضو والثلاجة

احنا كنعودو، حديث أو مغزل اللي نسيناها نرجعو ليها:
هابيل قتل قابيل على مرا أو المرا كيكولو هي سباب المشاكل، خرجت أدم من الجنة.
في الحقيقة حوا ما عليها والو، داك الشويطين ديال إبليس هو اللي غراهم باكل التفاحة. أو خرجهم من الجنة، التفاحة هي السبب. وهاد المشاكل كلها أو ماعرفتش علاش الخمر حرام كان المفروض التفاح هو اللي حرام.
خصنا فين مانشوفو التفاح نخنزرو فيه واللي يبيع التفاح نقاطعوه حنا العكس كنعطيوه قيمة. آ التفاح غالي، آ التفاح مزيان للصحة فيه الفيتامينات. تفاحة على الصباح كتعطي القوة للقلب.
ما فينا نفس. كان سبب الطرد ديالنا أو كنموتو عليه.
أنا بعدا ملي كنشوفو كنتلاح على مو أو كنغزو ما نخلي فيه حتى شنتفا. كنتاقم من والديه، يخرج لي ابا من الجنة ماحشوماش. صدقنا جارين علينا أونازلين للدنيا عالعجاج والخلا والشمس والقهرا والشوماج والحريك والتبزنيز.
توضرو مساكن. امنا حوا هترت مسكينة، لاحت حوايجها وداعت فالزنقة والناس تضحك عليها شي يكول الله يستر شي يكول سر العيالات، شي يكول آخر الزمان هدا.
المهم ما عندنا غرض.
أدم اولد، اولادو ولدو وكترت الدرية، ما كاين لاحالة مدنية ولاتا حاجة. باقا الأرض خاوية تسطل.
كبرو اولاد أدم وانتشرو فالدنيا، تشعبو أمم وقبايل، كنوس من كل ألوان وكبرت الدنيا وكثرت الحروب، قتلني قتلك دبحني ندبحك عورني نعورك.
وحوا مسكينة من عهد بونا أدم وهي كما هي تفتش بالليل والنهار وملي تلقى أدم ترجع للكدبة الأولى.
لا انت اللي تابعني ملي كنت فالاعدادية انت اللي دويتي معاي وكنت ليل أو ماطال كتوقف احدى البوطو ديال الضو وكتسناني نطل من الشرجم نسيتي ولا ندكرك آشيري.
وليدات بونا أدم كينقزو كالقرودة. الخبز صعيب، هذا عا الخبز أما الكومير والفروماج والدجاج والبسطيلا. حدث ولا حرج. حرب فالحقيقة حرب شاعلة عوافيها ما تهدا جري علي نجري عليك. والزحام فالطوبسات فالسوق فالسينمات فالترانات فالترنات فالفيترنات فالديور. بيتات الكرا، عشرة فبيت البو، الأم، الأولاد. كباط السردين
بونا أدم كان وحدو ما يخلص ضو لاكرا لاما عافين ما ولاه يركد
تصورو معاي واحد خينا من اولاد بونا أدم ساكن فبيت ضيق مزوج بجوج عيالات، كلشي فالبيت، الاثاث، الماريو ديال الحوايج التلفزة، الراديو، الثلاجة، أو واخد جوج عيالات، جوج عورات. إو واحد النهار جا عندو خالو ماعندوش فين يبات. كال ليهم فرشو لي عا كدام باب البيت. حينت كان الصيف، فرشو ليه. نعس.
إوا وحدة من العيالات ناضت عند راجلها. كال ليها:
الله ياودي راه خالي ضيف عندنا، ما بانت ليك عا هاد الليلة.
كالت ليه:
والو الليلة هي الليلة خلقت من هاد الليلة.
حصل مسكين وسلم أمرو لله وكال ليها:
-نوضي سيري للثلاجة أو شربي الما أو شوفي واش خالي ناعس أو لا فايق.
مشات حلت الثلاجة، شربت طلت بان ليها خالو ناعس.
قضاو الغرض لا حيا في دين.
أشوي ناضت المرا الثانية والو تانا.
-انعلي الشيطان يا هاذ المخلوقة.
والو تانا مالي مش مرتك.
كال ليها: وسيري للثلاجة ديري براسك غاد تشربي وشوفي خالي واش فايق ولا ناعس.
ناضت حلت الثلاجة، شربت، طلت بان ليها مجبد رجعت، تقضى الغرض.
إوا فالصباح ناضو فطرو أو هو يسول خالو:
كدوزتي الليلة آ خالي؟
-كلشي مزيان آوليدي عانى جاني العطش.
أو مالك آ خالي راه الثالاجة احداك علاش ما نضتيش تشرب.
وا وليدي نوض الثلاجة بغيتي تكمل بي تانا لا وليدي لا.

08 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 15:36

3 ... بداية الدنيا

شفتو على حالة. جوج عيالات والزحام والقهرة والدافيع دفعني ندفعك عيشين بزز، صحة، هكاك معنزين عاضين فالزمان.
تصورو معاي بونا أدم كانت عندو امرا وحده وكان وحدو فهاذ الدنيا واخينا عندو عابيت أواخد جوج العيالات.
صحة الوجه.
باز والله هيلا باز.
كاين اللي واخد ربعة. سبحان الله ماعرفت لهاد القوم واحد مع ربعة ما عرفت ككيدير.
المهم ما عندنا غرض.
.............................
العجب فالدنيا عجائب وغرائب شلا ما يتكال اللي ما طيح على بالك كاينة.
تخلطت الوقت، ضمست الاوراق أوفاش ماجيتي انت وزهرك.
بونا أدم خرج من الجنة وها حنا فالمحنة.
تطوات قرون وقرون وبنادم هو بنادم، الحرب هي الأساس، الصراع والتخاصيم والبهتان.
من أول الدنيا بدا الصداع، هابيل راكم عرفين ولا فائدة فالتكرار.
.................
بدات الوقت تململ، بدا بنادم يقفز تعلم مع الحياة، بدا يبني، ويحرث ويحصد ويصيد ويكربل وينعس ويفيق ويعطس ويتنفس ويكربل وينعس ثاني ويفيق الصباح وينعس ويفيق وياكل ويدير كل شي ..
تعلم بشوية بشوية..
هذي بداية الدنيا وبونا أدم هو L’axe.
الشقا والتعب والتكرفيس.
ووصل لشلا حويج بعدما كان غاطس فالظلام والجهل والمرض. واحد النهار فكر يطير. بعدما عيا من تقليد السبوعة والضبوعة والدياب.
جا النهار اللي بغى يولي طير أو حاول يطير....
واحد من وليدات بونا أدم من عندنا من البلاد حاول يطير بلا شك راكم تعرفوه !
عباس هاداك عباس بن فرناس.
راكم عارفين القصة جاب جناوح واطلع فوك الجبل، بقى طالع، طالع، طالع، طالع حتى القمقوم حتى ما بقى والو غير هو والسما كلموذن. أو هو يتصوطا بقى جاي جاي جاي جاي نكول ليكم نهار نكول ليكم نص نهار أو هو يطيح جا على قلقولتو دار تزت فوك الشانطي. جات لبينانص أو طارت به السبيطار. دارو به الطبا او هو ينوض كيضحك، بقى يضحك يضحك والطبا يضحكو يضحكو والفرمليات بقاو يضحكو يضحكو واحد الفرملية بقات تضحك تضحك حتى طاحت على عين كفاها ماتت مسكينة فالبلاصا .
Médecin chef سول عباس:
علاش كتضحك آ عباس؟
كال ليه أو هو باقي كيضحك والدم كيشرشر من راسو.
-واتوما عرفتو علاش ماطرتش ؟
كالو ليه علاش. وحتى الفرملية اللي ماتت كالت ليه علاش أو رجعت ماتت:
-حينت نسيت الزنطيط، التابع التابع مادرتوش بحال الطيور كال الله يضحكو يضحكو يضحكو.
عباس خلاهم كيضحو كيضحو يضحكو. أو مشى لافابو غسل راسو واخرج من السبيطار خاد طاكسي أو مشى فحالو.

09 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 15:40

4 ... الحريك خلاه لينا بن بطوطة

ودازت أيام وشهور وأعوام وقرون عاد اكتشفو الطيارة وطار بنادم بصح بلا ما يطيح على راسو.
أو من تم بقى المثال اللي دار شي زبلة كيكولو ليه واش انت طايح على راسك راه هذا المثال جاي من ايامات عباس بن فرناس.
.......................
وشوف اوليدات بونا أدم شحال تمحنو وسبابنا هي بومس أو داك الشويطين ديال إبليس.
توضرنا مساكن بونا أدم وامنا حوا تمحنو بزاف كافحو مع الزمان هم واليهودي الشويرف اللي كان مونسهم بالرويديو ديال الحجرة ترانزستور اللي شراتو ليه عمتو من عند الشينوي تريكتو هي اللي كاين دابا خلا ليهم البركة من داك الوقت. أو عباس بن فرناس خلا لينا عا التفرفير والتبوقيل، اللي طار يجيبها فراسو هدي اللي خلا لينا عباس.
................
شلا شكال فبنادم ها الكحلين، ها البيضين ها السمرين، ها الصفرين ها قهوة وحليب. ها نص نص.
تقسمات القارات ها الكحلة ها البيضة ها الصفرة.
المهم ما عندنا غرض.
حنا جينا فالكحلة ومشتاقين للبيضة كنحركو من الكحلة للبيضة باغين نوليو نص نص.
الحريك خلاه لينا بن بطوطة، ناض واحد النهار ما عليه ما به. طج مسكين كان ما عندو باش يخلص الكرا والما والضو والتريتات ديال واحد الشقة.
كحالت الدنيا فعينيه خرج من الأرض إلى أرض الله الواسعة قطع بحور أو وديان، غابات وجبال، صحاري وقفار، ما وقفوه لا في الديوانة. ما طلبو منو باسبور، لافيزا. صال وجال في كل قنت ما خلا بلاد الهند ولا بلاد السند. فين ما ولاه يبات، قابل عبيد وملوك، تعرض للسرقة وهذي هي حال الدنيا، فبلاد الهند سرقو ليه البزطام فالطوبيس، وواحد لاباراي واعرة جابها ليه خوه من زنجبار كتصور بنادم أو هو تحت الما.
المهم ما عندنا غرض.
واحد خينا من تريكت بن بطوطة بغى يدير بحالو ضاقت به الحال. لا فلوس لاخدمة لاردمة، هرب مسكين من البلاد حينت كان حامل.
العجب فالدنيا ومارضاش مسكين وتفقص، حامل لشهادة الإجازة وكيهيئ للسلك الثالث تلاكاو عليه السلوكة ومابان ليه والو. فكر وخمم ما نفعو عا الحريك، ما عندو لا باسبور ولا فيزا. اصحابو كل آش دار كاين اللي مشى مع فرقة ديال المسرح وحرك، كاين اللي مشى مع الفريق ديال المصارعة خلاهم تم أوفر كال من هنا دازو، كاين اللي حرك ما صوب لا أوراق وكاين اللي صوب وجا بخير كاين اللي تزوج بكاوريا كد جداتو. كاين اللي شبع غبرة تغبر مسكين.
المهم ما عندنا غرض.
خونا فالله حرك من مطار محمد الخامس هاز صاك على ظهرو دخل من باب المطار مع الصباح بكري باقين الموظفين ماجاوش واركب فواحد الطيارة وتخزن اللور. شرقت الشمش وجاو الموظفين وجاو المسافرين وعمرت الطيارة وجا الشيفور أو هو اللور مخزون ما شافو حد. طارت الطيارة واخينا مكمد، علات فالسما خينا ضمنت ليه الحركة حركة Luxe

10 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 16:02

5 ... طبايع وليدات آدم

دازت واحد المدة نزلت الطيارة، خينا نازل نازل لقى راسو فمطار أكادير.
نزل مسكين وهو يكول ويلي ويلي ويلي تا مالي دايخ كون عاركبت فطيارة غادة الطاليان ولا فرنسا.
بقى يدور فعينيه وهي تبان ليه واحد الطيارة مكتوب عليها Air France مشى يتسلت يتسلت، تلفت عالليمن تلفت عا الليسر ما شافوحد وهو يركب فالطيارة ديال Air France. عمرت بالركاب، سخنو الماطر طلع الكريسون والشيفور. طارت وعلات فالسما وخونا فرحان Air France –Air France شوية نزلت الطيارة .... فمطار محمد الخامس وايني مصيبة هذي نزل مسكين فكعان غادي ويدندن:
مالي أنا مال انا ما عندي زهر آه آيلي آه أيلي مالي أنا مالي أنا، حلف تا يحرك فالطيارة بقى يدور فمطار محمد الخامس.
النهار أو ما طال الطيارة اللي اطلع فيها كتنزل فأكادير حتى طاح الظلام وذنت المغرب أو هو يخرج بات احدى المطار. نعس مسكين عيان وهو يحلم. حلم براسو باغي يحرك والو ما معاتقش.
يالله حط رجلو فالمطار أوهم يقبسوه:
-عندك الباسبور
-لا
-الفيزا
-لا
-واش عندك
داوه للبوسط ديال البوليس كالو ليه:
-تسحابنا ناعسين، ما عيقينش الحمار راحنا اللي كنا كنزلو الطيارة فأكادير ومنعناك باش تحرك، راه شفناك ملي طلعت فالطيارة من كازا ونزلت فأكادير وملي طلعتي فAir France ونزلت فكازا. راه كلشي فالردار.
تسحابنا ناعسين والله آمك لا حركتي.
أو بداو عليه بالعصا يالله ضربوه الضربة الأولى أو هو يفيق مسكين لقى راسو فدارهم فالدوار ديال سبت اولاد بوعزيز. كان يحلم براسو حارك وحلم براسو كيحلم.
..................
طبايع هي فبونا أدم اوليدات أدم كلها أو طبعو. شحال إيكدك ما تحصي فيها. ها اللي مقلق ها اللي ضاحك ديما. ها اللي محساد ها اللي مدوخ ها اللي بعقلو ها اللي نص عقيل ها اللي ربع، كاين اللي كيرشق ليه يخدم الموسيقى فالكيلة، الناس باغا تصنط لعظامها، وما يطفيها حتى ينوضو الناس مع الربعة.
كاين اللي يجيك فالليل حتى ينعسو الناس عاد يحط القرعة تحت الشرجم ديالك ويبدى يفهم، كيتفلسف.

11 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 16:07

6... بزاف علينا النصارى

بنادم كحل الراس عا كيكدم ما واعينش، آصاحبي بنادم ولا كالبكر، بزاف علينا النصارى، الواحد يحرك احسن ويعيش مع الصالحين. الكور آصاحبي فاتونا بزاف. فالنظافة فالهدوء فالنظام فاللباس. واعا اللباس اللباس آ صاحبي كيعرفو يلبسو كيعرفو يتكلمو كيعرفو ينعسو كيعرفو ياكلو. منظمين آ صاحبي كلشي فالوقت.
وتا هاد البشر باز ما كيفهمش والله ما كيفهم ووالو البكر حسن منهم، بكرة خلقها الله، تعلف وتشرب وتزبل أو فيها النفع، الحليب، اللحم، الجلد، الروث ديالها كنشعلو به الوكيد واشعل بديال كحل الراس، ما تكدش حتى تدوز من حداه.
البشر البشر آ صاحبي. البشر ما منظمش. ما مربيش. يخ تفو.
واش تدير مع بحال هاد بنادم، آش تدير، طبايع مختالفة.
كاين اللي يجيك حتى وسط الطريق والزحام ويسرح الموطور عرض حابس الزنقة كلها أوداوي مع صاحبتو حت حت حت حت حت حت حت ..............
تكول غيطلع الصوارخ والناس تدور وتبرم ولا هو باغي يفهم حت حت حت حت .......
باز أو ملي تشوف فيه وتكول ليه سمح لي كيخنزر فيك واحد التخنزيرة بحال إلا الزنقة ديالو.
أما واحد خر وهدي هي اللي كتفقس. في أي إدارة كتلقى الصف وكيجي خينا من اللور ويوقف الكدام ويبدا عالتبنضيض باغي يدوز هو الأول ما كرهش يطلع فوك الناس بلا حيا بلا حشمة.
واحد النهار واحد خيتنا خلات على الصف، الناس مستفة كالسرديل وجات كتعيوج طق طق طق طق. دازت ديركت عند الموظفة المسؤولة.
-أهلا أنسام كيديرة لاباس عليك ça va صيفطني عندك بابا.
بلا حيا بلا حشمة.
واحد خينا من وليدات بونا أدم طالع ليه الزعف خرج من الصف وتم جاي كيقلد فختنا فالله.
-كيديرة أنسام لاباس عليك صيفطتني عندك ماما وداز.
إو هادي هي طبايع الناس.
كاين اللي ما يرتاح غير إلا ما آذى الناس، واقف مسمر احدى شي حانوت أو بارك حاضي الدرب. هذا بنى، هذا ريب، هذا مرض، هذي ولدات هذي طلقت، هذا تختن، هذي حصلت، هذا حصل، شتو تحبى شتو دخل.
والو ما ينعس إلى ما ادى الخبار ديال الدرب كلها داير Registre فدماغو.
مضروبة فيه حتى ساكته وما بغى يدخل سوق راسو، والو عاصر على الدرب ما تفوتو حتى حاجة. خدام بعرك عينيه، إلا فاتو شي خبيرة يمرض، يعرص.
إو هذا حال الدنيا.
أمنا حوا تاهي كثر وجدر حال واحوال، النميمة فالحمامات فالعراسات فالديور فالادارات.
التحنزيز فالدم. ونعاودها ليكم بحال الخرافة.
12 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 16:17

7 ... جبايهي فالدوّار

كانت عندنا فالدرب واحد الشويرفة يكولو ليها مي زهرة، مي زهرة يا من لا يعرفها سالا وقتها، كتلعب فالوقت بدل الضائع. أو تاهي حاضية البق لا يزهق. واحد النهار جايه كتدندن، الدراري كيلعبو الكرة، شافوها، أو هم يبوطوها طاحت على عين كفاها، وتعلكو رجليها. كبل ما تجمع النوضة كالت ليهم:
-هو العربي سقف، آسيرو الله ينزل عليكم النعلة ياولاد الحرام قويتو.
قشعت السقف وهي طايحة، شكون اللي يقدر على هذا التبركيكة فالعالم.
.............................
وشحال يكدك ما تحصي من طبايع الناس. وليدات بونا أدم شلا والطبايع بالملاين وكل قبيلة وكل شعب أو طبعو.
أش نكول ليكم.
كاين الفضولي، كاين اللي داخل سوق راسو، كاين اللي دافع حميرتو للزحام، كاين اللي عايش بالكدوب والقوالب، كاين اللي راس مالو عا هضرة، عا القرنابي. والسنطيحة، الجبهة، الجبهة كتنفع وكثير من الخلق قاضي بها الغرض وعايش فالواجهة.
الجبهة كتنفع ولكن إلى كنت بعقلك راه مشي ساهل تكون جبايهي.
.....................
واحد خينا من أصحاب الجبهة. جبايهي حا شاكم فواحد الدوار كان دافع السنطيحة أو طالق الدعاية كنعرف القايد كنعرف الباشا كنعرف العامل ونعرف الوزير فالرباط.
كيلبس مزيان وكلشي كيخاف منو، ضاربين ليه ألف حساب أو هو عا الجبهة ما كيعرف تا واحد.
واحد النهار القايد استدعى الدوار، كلشي تجمع كدام القيادة إو خينا جا. لقى الصف طويل، الدوار كلو مجموع.
إو صاحبنا حصل واش يدير الصف مع الناس ما جاتش هو زعمة صاحب القايد ويعرف الباشا والناس الكبار فالرباط.
ما يمكنش يدير الصف حشومة حتى التعاويد.
إو خينا حصل أش دير أش يدير أش يدير. جا يرجع ما يمكنش خصو يحضر، جا يدير الصف ما يمكنش.
هو صاحب القايد ويدير الصف مع الناس تاع الدوار.
إو خمم تاعيا، توكل عالله أو سبلها أو درم وادخل على القايد إو القايد ما يكونش من العاكزين ناض ليه. ما خلا فيه عا اللي نسى، جرتلو، شبع فيه تصرفيق ومعيار وشرك ليه حوايجو وركلو برا.
خينا خرج مبهدل آخر بهدلة. وقف عند الناب ديال القيادة والناس مستفة، العمامة طايحة، الجلابية مشركة.
المهم خينا خرج كيضحك ويصوب فالعمامة ديالو وكيكول:
-وايني هاد القايد شحال عزيز عليه الملاغة واي واي واي .
بونا أدم كان مهني من النميمة والتحنزيز وبخ ودفيع كبير، والو ما عندو فاش يحنزز، غا هو اوحوا وليهودي الشويرف مول الرويديو ديال الحجرة، غا هو وإياهم وما تا عمتو ماتت وخلاتو صغير يلعب بالرويديو ترانزستور.
وهذي هي حال الدنيا وهذا هو بنادم، طبايع على كل ألوان وشكال أو شحال كدك تحصي وشحال كدك تحكي.
وتشعبت الدنيا بولاد بونا أدم وكثرت الاديان وقوى الشر والضاريب وقوى الفساد وساد فالبلاد.
الفساد وما أدراك ما الفساد.
13 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 16:23

8 - حلقة لم تنشر

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

رد: عداوي / تأليف: شكيب عبد الحميد . الاتحاد الاشتراكي

مُساهمة من طرف بنت جبالة في الأربعاء 17 يوليو 2013 - 16:26

9 : زمان واش من زمان!

كل شعب أو كل سلالة عندها لباس وطبخ وعادات والله واحد، لو كان غير شوية العقل كمشة ديال العقل تنفع. واك واك العقل.
ومشات ايام وجات يام وبونا أدم كيتلاوح مع الوقت يخرج من قفز لقفز إلى يوم يبعثون.
وكنظن دويت بزاف ودخلت وخرجت فالهدرة شلا ما يتكال لاتديوش علي، راه اللسان ما فيه عظم.
ها بونا أدم، معا ليهودي الشويرف مول الرويديو ديال الحجرة طرانزستور. كان شي رويديو ديك ساعة ماكانش كان عالشويرف أو بونا أدم وحوا مسكينة وعمة ليهودي اللي ماتت وخلات ليه الرويديو.
وجا قابيل وهابيل وتبعهم انطوني كوين وعاد عناق بن عواج اللي يشوي الحوت عالشمش، كان طويل طويل كيوصل عين الشمش. كتعود لي عمتي كان إلى نعس كتجيب ليه مو الفطور كتبقى غاد غاد نهار باش توصل ليه تفيقو باش يفطر. ملي كينوض كيولي عالي ماكتبقاش تشوفو.
واش هاد الشي صحيح ولا كذوب سولو عمتي هي اللي عودت لي.
كانت مسكينة صندوق العجب ديال الحكايات.
حكات لي على راس الغول، على هينة، أو حكايات الأنبيا، قصة سيدنا موسى، سيدنا عيسى، سيدنا إبراهيم الخليل ملي حركوه أو سيدنا نوح ملي صنع السفينة أو هرب مع قومو، سيدنا لوط مع قومو اللي كحلوها وقلبو سفاها على علاها.
وحكات لي على سيدنا علي والصحابا ملي كانوا كيحاربو الكفار وحكات لي على عنترة وقصتو مع عبلة وكالت لي بلسانها:
كان عنترة بن شداد يحارب الكفار مع سيدنا علي، ملي كيهز السيف كان يقتل 500 على اليمين و500 عاليسر ومسلك مع الوقت واش يدير، الزمان صعيب الوقت بغات ذاك الشي.
هاد الشي اللي حكات عمتي والله يرحمها ويبشبش الطوبة اللي تحت راسها.
واللسان مافيه عظم، وأنا عا داوي.
زمان واش من زمان. تخلطت الأوراق أو ما بقيتي تعرف شكون اللي معاه الحق، والبق ما يزهق. فحص افتحص، جبد الأشباح وفضح وتصفح الجرائد تلقاها عامره خبارات.
هذا رئيس..
عفوا هذا بايكو والشعب ذبان
ماركة واش من ماركة.
وإلا كالو أسد أسد.
بشار. منين جاتو البشارة.
شفار.. غدار.. كيدار.. حمار.
شعب كلو بارك يقاضي فيه.
فهل يعقل يا سادة يا كرام أنه في قديم الزمان كان الوحش والضربان يجول فالصحاري..
وأتا باركة من التلاوة.
محال يكون هاذ الشي صحيح. ع المريكان كيضحو معانا علاه زعم بشار ذاك الزوين الطويل عينيه خضرين شعرو ممشوط يقتل شعب على كدو.
هذا شي فيلم أولا كاميرا خفية. هوليود كتصنع المعجزات هو سيدنا موسى أو صوروه كيشق البحر.
تيطانيك اللي فات قرن من الزمن أو صوروها لينا من ذاك الطراز الرفيع. كيبان ليك التشقليب، أو ديكابريو مع كيت ونسليت كيتشقلبو أو الباطو مقصوم على جوج وي وي وي. فيلم واش من فيلم. عاد غدي يغلبهم يصوروا فيلم ديال بشار الأسد.
ساير كيكلب فالبشر. محال يكون هاذ الشي صحيح. قناة الجزيرة كتقنبل باغا تبيع أو تشري بالإعلام.
16 يوليوز 2013

_________________

بنت جبالة
مشرف (ة)
مشرف (ة)

انثى عدد الرسائل : 1429
العمر : 40
تاريخ التسجيل : 11/07/2006

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى