آح على الزمان الغدار

رماتني ليام من دار لدار
مللي الزمان عليا دار
لقيت راسي وحدي براني
هايم فدروب ليل ونهار
فين صحابي..نساو بابي
فين حبابي كبار وصغار
فين ليدين للي كانو فجيبي
فين هوما صحاب لوتار
كنت وكانوا ليا وسادة
واليوم شارب وحدي لمرار
فين ولادي...فين كبادي
آخ على الزمان الغدار
كنت بشاني وراسي عالي
يدير بحسابي كل جار
رافع راسي سومي غالي
عايش هاني بين لخيار
بغاوني مكفي بين قراني
نجري ونقول هذا عار
تعنا بالطوب وهو راشي
الدنيا فانية والآخرة هي الدار
شحال ما عشتي يراك ماشي
كون لبيب تكشف لسرار
ميزاني ثقيل والله عنايتي
والعبد مالو فعايلو منشار
يا السامع صغا ليا وسمعني
لا يغرك الكلام دير عيار
نوصيك لا تيق رد بالك
الدنيا غدارة وبنادم مكار
سلا 11 شتنبر 1991
محمد بلغازي