الورث سباب العداوى / كلمات الزجال لحسن بوعاد

نعيش درويش ما يهمنيش" لكريم ضامن لقمة العيش
نعيش على قد الحـــــــال " هـــــــاني مرتاح البال
ما يهمني طمع ولا مال " على لحباب و الخوت نسال
شفت شحال من حالة "على الورث ماتو نسا ورجالة
الورث سباب العداوى " ما بين الأهــــل و الخاوى
من يوم دفنو المـــوروث " فوق القبر ناض الغوث
شي بـــــــــــغى البلاد " وشي بـــــاغي الساروت
هدا ســـــــــيفو مسلول " غير قــــــــاتل او مقتول
بالطمع شعلت الفتيلة " وبين الخوت ناضت لقتيلة
الخصام ليل و نهار " الطمع عمى لهم الأبصار
خرجو للعيب و العار " وشحال منهم خوات الدار
شي سكـــن في المقابر " وشي بـــــــــين الأسوار
تقطعت صلة الأرحام " الخصام على طول الأيام
على الطمع دعاو الميمة "سرقو وكلاو حق لتيمة
القلب على بالطمع تعامى& ما فكرو ولاحسو بندامى
ما فكرو ولا ضربوحساب " بلا ضميرعايشين العداب
الطمع من كان أسباب " في الخصام وفراق الأحباب
هدا حـــــــــــــال الوارث مع المــــــــــــوروث
فــــــــــوق قبـــــــــــــــــــــــــــــرو ناض الغوث
مابيـــــــــــن البنــــــــــــــــات و الخـــــــــــوت
ناسيـــــــــــــــن طمع الدنــــــــيا يفــــــــــــــوت