الخرفان والعيد

الخرفان والعيد...

في الحظيرة تجمع للخرفان..

بو قرون : سمعو آلخوت الخرفان والعيد 1447906319

المجموعة : وي

بو قرون : جا الوقت ..غدا يركبونا في الكاميونات

الخروفة : علاش

بو قرون : قرب العيد نسيتو ..والبارح اختارونا ..خصنا نوجدو راسنا

الفرطاس : واشنو المعمول

بو قرون : نظفو حالتكم ونقيو سنانكم

الكبش : وعلاه غاديين للعرس واللا السوليما

بو قرون : غدا نتفيكتاو لشي سوق اثنين أو حد أو يوم من يامات الله ويمك لسوق تيجاري أو معرض أو كاراجات احنا وزهرنا ..

الكبش : واشكون اللي عطاك الحق باش تآمرنا وانت داير نظاظر بحال حولي مهم

بو قرون : فكها بلا ما تعذب مخك دوزني وخلي الحالة هي هي آ شاداك لشي انتخاب لخوت ساكتين وانت فيك بوطزطاز

الكبش : الساكتين موافقين ..كمل

بو قرون : من بعد ما تكملو النقا خصنا نبينو قيمتنا ونكونو حسن من الكيبات لخرين

الفرطاس : خصنا نبانو..

بو قرون : أنت والخروفة كاع لا تبانو.. الكليان كايديوكم غير باش تكملو بولفاف والقديد والكرداس وكل ما عملاتو شميشة من غدايد لمالين لعدس والبصارة والخبز الحرفي

الخروفة : عندك الصح ..أنت على بال

بو قرون : سيرو ارتاحو

الكبش : ما هنا راحة ! عزلونا وخلاو لخرين

بو قرون : ولايني انت حولي ..ما اختارونا حتى عرفو قيمتنا في الشكارة ..واش كاين شي بنادم كايكره الربح ؟! حنا وجوه الربح ولخسارة في الجراتل

الكبش : قنعتيني

بو قرون : نعسو في خاطركم ..

توقفت الشاحنة أمام الحظيرة وبدأ العد والعزل , لتبقى الخرفان الغير المؤهلة للعيد وللثمن الرفيع ..أخيرا وبعد رحلة قصيرة , توقفت الحافلة ..

بو قرون : الحمد لله , جابونا للمعرض , لتواسع وبوكو كلييان فلتنا من لوسخ وتكرفيس

الخروف : فايت جيت لهنا مع بياع آخر

بو قرون : واقيلا تنقلتي بزاف

الخروف : حتى طبت , نتمنى تكون آخر رحلة

بو قرون : باغي اتذبح

الخروف : وعلا ش اللا ..كلنا لها

بو قرون : أنا بعدا باغي نولي للمحل اللي ولفتو

الكبش : كلها وزهرو

وداخل المعرض , قدموا للخرفان الأعلاف والمياه ..

بو قرون : شفتو الفخفخة ..احسن من السوق اللي كل وشتا أو الصهد وتقلاب ..

الكبش : شوف لهيه , شكون هاد الرجال اللي جايين

بو قرون : الخروف المولف كايعرفهم ..هادو جاو يعبرونا ويلصقو في ودنينا بطاقات الكيلوات ..باش نتهناو من اليدين

بعد انتهاء عمليات الوزن ..وعلقت بطاقاتها للخرفان ..

بو قرون : بلا تبعبيع ..الهدوء باش تعطيو للكيب ديالنا قيمة ..راه تبعبيع كايدل على البرامل الفارغة , شفتو البوق كايصدع بنادم حيت خاور من الوسط , كونو نخوة ودفعو كبير في الوقفة ..

الفرطاس : خصنا نتباعو مزيان

وبدأت الاختيارات ..

بو قرون : هاد خينا حاط عينيه هو وامراتو على مول 64 كيلو

الكبش : باين عليه درويش

بو قرون : راه جارو ..وحالتو مقلقة

الكبش : حيت شاريه بالكريدي

بوقرون : مسكين و64 غالية

الكبش : مراتو اللي غرقاتي وعارفين العيد سنة

بو قرون : شوف هداك خينا واخد جوج حوالا 70 و 70

الخروف : باين مرفح

المجروران : سكتو آلمجسادة , احنا غاديين للمرسيدس , نتبرعو قبل ما نتسلخو

الكبش : سعداتكم

الخروف : شفت حتى واحد ما اداها في وفي 54

بوقرون : لا تقلق دابا ايجي مول موسك

الخروف , من فمك لربي

وبعد قليل ..

بو قرون : مبروك , جاك اللي يديك

الخروف : بسلامة

وتوالت بسلامة من الفرطاس والكبش والخروفة والخرفان التي بيعت فبقي بو قرون وثلاثة آخرون ..

بو قرون : ما عرفت علاش ما اشراوني ؟؟؟!!

أحد الثلاثة : بغيتي الحقيقة

بو قرون : قلها بلا ما تخاف والله ما نطحك

ألآخر : أنا نقولها , انت شارف , شافو قرونك كبار عرفوك ما تطيب على عام

بو قرون : صحابني لكبوريا زعامة وهيبا ساعة ما هي غير فنطازية واللذة في الصغر

أحد الثلاثة : هانت فهمتي راسك

انتهت فترة البيع وتم الاستعداد لرد الباقي إلى ديارهم

بو قرون : غدا العودة

أحد الثلاثة : وجد راسك للعام الجاي

بو قرون : للموت قبل ما نتدبح

الآخر : حتى واحد ما ضامن عمرو

بوقرون : أنا ضامن حتجة وحدة

أحد الثلاثة : آشنو هي ؟؟

بو قرون : راجعين للنعجات وتهنينا من المنافسة ..

الآخر : لا تنساش أن النعجات غاديين يولدوا اللي غاديين يصفطونا للكرنة أو ذبيحة قبل من العيد

بو قرون : المهم احنا حوالة من زمان ..

الخرفان والعيد

الخرفان والعيد

الخرفان والعيد :: تعاليق