صدى الزواقين Echo de Zouakine
مرحبا بك عزيزي الزائر. المرجو منك أن تعرّف بنفسك و تدخل المنتدى معنا ...اذا لم تكن قد تسجلت بعد نتشرف بدعوتك للتسجيل في المنتدى.

السيبة في المدرسة العمومية المغربية

استعرض الموضوع السابق استعرض الموضوع التالي اذهب الى الأسفل

السيبة في المدرسة العمومية المغربية

مُساهمة من طرف redouani في الثلاثاء 22 مارس 2016 - 20:39

سهام البارودي- كود

—-

مؤخرا تفرجت فواحد الفيديو ديال واحد التلميذ سكران وسط القسم مهجج التلاميذ و الاستاذ كايسايس معاه و الدري ماباغيش يحشم ! فاش سولت الناس لي كانعرف لقيت بأنه فعلا ف2009 خرجات مذكرة كاتمنع طرد تلميذ خارج الفصل و ف2014 مذكرة كاتمنع توقيف تلميذ عن الدراسة (المجلس التأديبي لي كنا كانعرفوه)!

مافهمتش كيفاش كاينة مذكرة تمنع طرد المشاغب خارج الفصل ؟ واجي شدو نتا نيت آ سعادة الوزير و لا دير شي اتفاقية مع وزارة الداخلية تسيفط لك البوليس و لا المرود يتكلفو بيهم !
هاد الناس لي كايخرجو لينا فحال هاد القوانين كايعيشو فواحد الديكالاج خطير مع المجتمع عامة و مع القسم خاصة ! القسم لي خاصو يكون هوا داك النواة ديال المنظومة التعليمية ! و كل مرة كايخرجو شي قوانين و شي مذكرات عاد ماكايزيدو يقودوها على التعليم لي اصلا اصلا راه ماشي فالحضيض ! وصل شحال هادي للحضيض و دابا راه دايرين تما منجم ديال الحضيض كايحفرو تحت منو باش يشوفو واش مازال كاين فين نزيدو نهبطو بالتعليم لأسفل سافلين!

قالك لا للهدر المدرسي !ناض بنادم فين ماكاين شي واحد خرج من المدرسة و مشا كايبيع الميكة فشي سويقة و لا كايتسخر لشي بزناس كايردوه للقسم من بعد ماكايكون دوز مدة لابأس بها فالزنقة! راه وي فهمناكم زعما حقا ما حقا بغيتو تنقدوه و لكن راه الدري دار مع راسو تا شبع فالزناقي ، تعلم يتشمكر بالشرويطة و يفتخ الجوانات و يضرب تاهوا معيجينات و تجي نتا تجيبو تخشيه وسط التلاميذ هكاك عادي زعما فحالا ماوقع والو !هادشي هو لي كايتسمى الضحك على الذقون و بالدارجة “الطنز العكري ” و هادشي كلو علاش؟ باش فاللخر نقولو راه عندنا نسبة تمدرس طالعة و عندنا كدا تلميذ و كدا تلميذة فدوك الاحصائيات لي كايدوزو فالأخبار ديال الوحدة … مايمكنش ! راه رضيتونا كيادر على هاد الحساب و فالاخر فيمن كاتجي الدقة ؟ شكون كاياكل العصا ؟ الأستاذ !

فينما كاين شي شمكار هايش مايشي ماقد عليه لا باه لا مو لا المخزن كايسيفطوه للمدرسة يوحل فالاستاذ !يعمر القسم و يشد طابلة و يتزاحم مع داك الشوية ديال الباشار لي باغي يقرا و فالاخر يقولك ماقراوناش مزيان ! “الاستاذ ماكانش كايقرينا” و كاتلقا شي مو و لا باه تابعو كايغوت ” آه ولدي ماقراوهش مزيان” ” مابقات قراية فالمغرب” ! تا فيناهوا التلميذ اصلا معامن غايخدم الاستاذ ؟ راه داك le minimum لي خاص يتوفر فالتلميذ ماكاينش ! واش التلميذ لي كايدخل للقسم هاز كاطورزة تلميذ ؟ واش بوزبال لي كايمشي للمدرسة مقرقب ضارب سمطة ديال النورداز تلميذ ؟ واش لي كايهضر مع الاستاذ و كاينوض يطايف معاه وسط القسم و يشبكها بونية بنادم، غايقرا و تكون منو الكاينة و نشوفوه طبيب فالمستقبل كايفتح للناس على الكلاوي ؟ طبعا لا ! و طبعا باين المستقبل ديال هاداك خونا من التيساع كي داير فالله يجازيكم بيخير ماضحكوش علينا ! ماتردوناش كيادر ! راه كلنا دزنا من المدرسة العمومية و عارفين بلي المشاغب لا ماجريتيش على طاسيلت مو و قمعتيه راه غايدير ليك “البلبااالااا” و يطلع ليك فوق راسك و يخرى ! و لي بغا ينقدو يشدو يديه عندو لدارو ،ياك الناس لي كايخرجو هاد القوانين غالبا لاباس عليهم ملي كايبقاو فيكم الدراري تال هاد الدرجة و كاتحسو بالحنااااااان هزو آ خويا ديه عندك و خشيه مع ولادك و بناتك و سيفطو لاميسيو ! ماشي دخلو من الزنقة ديريكت للقسم هو اصلا ماحاملش دينمو داك القسم كايمشي ليه غي بزز ! و لا تبزز على الاستاذ يشدو عندو فالقسم فحالا القسم ولا حضانة الاستاذ كايدير فيها baby sitting فينما كاينة شي خرية تهزوها طليوها على راس الاستاذ!




و هو اصلا داك التلميذ براسو القسم بالنسبة ليه حبس ! سيلون ! كايمنعو من الزنقة و حلاوة الزنقة و الدوران فالزنقة و السعاية و التشمكير و الشفرة و الكريساج و هاد لي زاكتيفيطي لي هوا لاقي فيهم راحتو ! تجي نتا آ دادا الفهيم، تسد عليه مع استاذ وسط القسم ! و طلب منو يكتب و يحفظ و يصايب التمارين و يدوز امتحانات و يشارك و يهر صبعو… ! و مالو مسخوط باش يسمح فمتعة الزنقة و حلاوت التسرهيط فالزناقي على قبل القسم ؟ مالو صكع ؟
فيناهي لوطوريطي ديال الاستاذ فاش تمنع عليه نتا يطرد مشاغب خارج القسم ؟ فيناهي هبة المدرسة فاش كايولي التلميذ عارف راسو واخا راه كلشي متعاطف معاه و الاستاذ ماعندو مايدير ليه ! داك التعاطف الغبي لي ولينا كانشوفوه مؤخرا ديال حقا ماتقول للتلميذ والو ! حقا ماتقيسوش ! ماتدويش معاه ! حاول عليه!تكايسو لينا على بعيرير ! حاولو لينا على مشاعر بعيرير ! عنداكم نفسية بعيرير! التعاطف المريض لي كايصنع لينا عاهات فالمجتمع عوض ماتحمل مسؤولية الكالاخ و الفشل ديالها كاتلوحو على التعليم و الاستاذ حتى ولا بنادم كايتخايل العلاقة بين الاستاذ و التلميذ علاقة baby sitting كايلعب فيها الاستاذ دور ” النونو” لي خاصها تهز التلميذ و تراري بيه “نكغا مومو …” “نكغا بوزبال ” ” نكغا هايش مايش” تا قرب هاد التلميذ يطلع فوق راس الاستاذ و ي.. !


redouani

ذكر عدد الرسائل : 189
العمر : 52
Localisation : Rabat
تاريخ التسجيل : 01/03/2007

الرجوع الى أعلى الصفحة اذهب الى الأسفل

رد: السيبة في المدرسة العمومية المغربية

مُساهمة من طرف redouani في الثلاثاء 22 مارس 2016 - 20:43




redouani

ذكر عدد الرسائل : 189
العمر : 52
Localisation : Rabat
تاريخ التسجيل : 01/03/2007

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى