الرحى و القرشال

من طرف منصور الأحد 8 يوليو 2012 - 19:13

فين ليام المغزال والقرشال
وطحين الرحى والغربال
فين فقيهنا ولوحة وصلصال
و الحيك والنكاب والخلخال
كيف تنسى لميمة من البال
نتخياها في الصوف تفتل
تكبر للخالق وتقرشل
مشات لحنينة الحال تبدل

***

الدمع من عيني نزل
على خدي سال
نفسي طرحت عليه سؤال
ملي شفت المغزل والقرشال
طحت في البال أنت يا الميمة
أنت خداك الله وهو في مكان مازال
لمن يسول عليه طواه النسيان
وأنا نشوف فيه صورتك و الخيال
وشكون يعرف ليه
من غيرك يا الميمة
خليتي في جنب الرحى والغربال
لي خبزهم بشهوة من يديك يتكال
نشوفهم ونتذكر أيام زمان
ملي كنت في جنبي يا الميمة
أنت لي الصوف في يديك حرير
و المغزل بالزربة ضاير
و تقرشيلك يحير العين
الرحى تدور بغناك الزين
يا مولات القلب الكبير
يا حضان الخير
أنت يا الميمة

سعيد محمودي