واقعة مكناس: التشمكير فالحرم الجامعي / الطيب حمضي

من طرف mohamed الأحد 22 مايو 2016 - 15:46

الواقعة (وما أدراك ما الواقعه) : شي شمكارا فجامعة بمكناس قاليك هم طلبة وكينتميو لتيار سياسي يساري راديكالي سميتو البرنامج المرحلي ، قالو حڭا ما حڭا حنا كنشكو فواحد العاملة بالمقصف يعني buvette . شكو فيها بلي كا تجسس عليهم لصالح شي تيار امازيغي فالجامعة. وشقالهوم الطنطون دراسهوم اجيو ألرفاق نديرو لهاد السيدة وسميتها شيماء محاكمة جماهيرية. غمضو ليها عويناتها وبداو كايحاكمو. والحكم ديالهم صدر بحلق شعرها وحواجبها و40 تصرفيقه. وداك شي اللي كان.
داخلت عليكم بالله والبزيزيلة اللي رضعتو دابا هاد التصرف واش يمكن يصدر على انسان سوي فالاحرى يكون قاري وكيفهم وكيقول مع راسو مناضل ويساري وراديكالي من الفوق!
أنا كنتكلم على اللي دارو هاد الفعلة أو شاركو فيها أو حضرو ليها وهم كيستمتعو بهاد الجريمه وضاربينها بسكتة ... كلهم هادو ولاد السوق مقطعين وشماكريه ، بزاف عليهم، شماكريه ..
دابا يا ولاد الكلاب انتما مطفرينو شي زفته حتى يتجسس عليكم حتى سراق الزيت بقا غا فصيل طلابي آخر يخددم عامله باش يتجسس عليكم؟
ما طفرتوه حتى فقرايتكم ما بقا ليكم غا النضال وتياساريت وتاراديكاليت
يا الجهال ، باقي ما دخلتو حتى جوج حروف ديال القرايه فريوسكم ووليتو تعرفو تديرو محاكمات وتصدرو احكام وتنفدوها هاكا بلا حيا بلا حشمه؟
جاب الله اللي نتوم غير طلبه ما شا شي حاجه كبيره فالبلاد وفيدكم شي سلطة بحال شي مقدمين مثلا او شي مرود، كون خرجتو للشارع تڭلسو الناس على القراعي وديرو ليهم الطياره وتسيفطهوم لشي غباقي
أش من قرايه فالدنيا قريتوها يا لبراهش اللي تسمح ليكم تمدو يديكم على بنت بوحدها وانتم شلا دكورا حيت كلمة رجالا بزاف عليكم ، وتكرفسو عليها نفسيا وجسديا، وتعنفوها وتشوهوها وتكرفسو عليها؟
قريتو جوج حروف ورجعتو ريوسكم شرطة قضائية ونيابة عامه وقاضي التحقيق وصدرتو الحكم ونفدتوه انتوما نيت؟ بلا دفاع بلا استيناف ... داخلين العداله بصباطكم. غير أجي وحاكم ونفد، الله ينفد فيكم الحق!
أنا كنتكلم على اللي دارو الجريمة او شاركو فيها وخا غير بالفراجه... وما عرفش واش اللي تعتقلو لحد الساعة مورطين ولالا، هدا شغل آخر، ما شي شغلي انا.
انا بغيت نفهم واش التيار ديالهم صدر شي بيان كيدين هاد الفعله وما شابهها أو كيتبناها ... التيار خصو يخرج من روندتو باش نعارفو معا من كنتكلمو
وانا ماكنتكلمش على هاد الجريمة بوحدها، انا داوي على مثل هاد الممارسات كلها: حتى واحد ما عندو الحق يمس شعره فانسان آخر، يكون فصيل طلابي ولا بوڭليب لكحل...
هاد القضيه ضرتني فخاطري بزاف تضامنا مع الضحية ، وتضامنا مع ضحيه أخرى اللي هي الجامعة: أش من جامعة بقات ادا كان كيوقع فيها هاد الشي وعلى يد من؟ على يد طلبة .....
واش الجامعه ما بقات صالحة غير للعنف والجريمه وبيع البخور والجاوي وكتب أهوال القبور ؟
ايوا هاد شي كيطلب من المجتمع كلو يضرب الفڭده فالجامعة المغربيه ادا مازال فيها مايتنقد ....
النيات الطيبة والارادات الحسنة موجوده وبزاف فالجامعة المغربيه ولكن مغطي عليها الهيبوش بالافعال والعنف والزعيق ديالو ..
النيات الطيبة والارادات الحسنة موجوده وبزاف فالجامعة المغربيه ولكن خصنا نشوفو كيف نعاونوها باش ترجع الجامعة مركز للعلم والثقافة والتكوين والحداثة ....

واقعة مكناس: التشمكير فالحرم الجامعي / الطيب حمضي 3098991325652312417640558578123535508414832701130n

واقعة مكناس: التشمكير فالحرم الجامعي / الطيب حمضي 3098991325652312417640558578123535508414832701130n

Hamdi Tayeb
facebook