احْسينو مولْ الجورنالْ / الشاعر أحمد البقيدي

قبل انشاء المواقع الوزانية الالكترونية الحالية والفايس بوك كان الوزانيون يتقاطرون على كشك احسينو للإطلاع على الأخبار الدولية والوطنية والمحلية فمن هو احسنو؟ وهل لا زال اهل وزان يذكرون هذا الرجل ؟

احْسينو مولْ الجورنالْ

حسن أو احسينو بائع الجرائد بوزان خدم مهنة الصحافة جل مراحل حياته من خلال توزيع الصحف والدوريات أقيم له حفل تكريم بوزان يوم6ـ5ـ2000 قدمت خلاله هذه الزجلية اعترافا بالجميل

باســــم الله بــــــــاش كيبـــدا البـادي = ويصــلى علــى مـــــــولاي محــــمد

نظمت قصايد وماشي بحــال هادي = هــــــي ملحمة بمشاعر وجـــدانيــــة

هاد الراجل الوزاني، خْلق فالمْريتاحْ = وحلْ عيـــونو فْالشقـــــــــــا والكفاح

مـــــا كان عندوشي الرْكايز صْحاح = الوالـــد مْشا عند الله والأم غير ولية

و هكــدا الولد بدا يخدم على دْراعو = بشْ ما يمد يدو ما يسمع حد صْداعو

كيتــــألم ويبكــــــي ويمسح دموعو = ويخـــدم بالاخلاص والصدق والنية

خـــدام كيطيبْ الخبز للناس فالفران = وهو يعلم الله واش شبعان ولاجيعان

مريــــض، كيضروا راسو أو عيان = ماكـاين لا رخصة لا شهــــــادة طبية

*************

و هكـــدا كبْــــر العزري ولا راجل = متبـــتْ ،رزينْ ، صـــــابر، وعاقل

و بْـــدا يشــــارك في الفدا ويناضل = وينخرط في المنظمـــــــات الوطنية

سلـــو عليــه بوعياد فـــي المقاومة = سلوطريق الوحدة وما قلع من دومة

سلـــــوعـــــلى خــــدمتو لهده الأمة = و سلو عليه حركة الطفولة والكشفية

المسيرة الخضــــــرا تعطيكم خبارو = هــــــو وسكان وزان ومـــــــا دارو

كلشـــــي خرج وســـــاد باب دارو = وحسينو الاول مــحزم بالبطــــانية

وقبــــل و مـــــن بعــــــد الاستقلال = كان حسينو أول من بــــاع الجرنال

كــــوزع الاخبار بالصورة والمقال = مــــــن القشــــــرين للرمل للزاوية

عمل مع اللكماني وبندي الله يرحمهم = و الوارث والمــــــكتبــــــــــات كلهم

ماعمــرو ما غشهم أو تخاصم معهم = حتى عمل كشـك ديالو في القيسرية

و هكدا حسيـــــنو بدا يبيع لـــــراسو = ويطلــــــق بالدين ويسمح فــــفلوسو

عنـــــدو القراء هما حبابو هما ناسو = والصحـــــافة هي المرا ديالو الثانية

هــادي مطبوعات جايا من سابريس = وهدي مجلات وجرائد شوص بريس

هــــا الاتحـــاد ها العلم ها الكواليس = هاالميثاق والتجديدوالأحداث المغربية

للي بغا شي كتاب أو جـــــــــــريدة = كيبــــدا يتصفح القديمة والجدـــيدة

وبقى احسينو مسكين بلا فــــــــائدة = وماقضى من اجورنال حتى مزية

*************

الفضل دْهاد الراجل كبير على وزان = مايتـــــرد ما يتعوض ما يتقدر بثمن

ما ينصفو لا زجال لا شاعر لا فنان = ولا حتى حفـــلة بحال هدي تكريمية

الراجل ضحى وعطا شبابو لمدينتنـا = وفنا وقتو وعــــمرو فــــــــصحافتنا

قرينــــــا حنا و قـــــراو ولــــــيدتنـا = وبقاهوالأخ الحنون للاسرة الوزانية

ومــــــزال محــــبوب عند الجـــميع = بالمــــكانة وبالمقــــــام ديالو الرفيع

حفضـــــو لـــوليداتو ياربي يا سميع = وطول عمروبالصحة والهنا والعافية

بوزان في6/5/2000

يمين القوس كان محل احسينو لبيع الجرائد

-------

http://tinyurl.com/gu5uvng

احْسينو مولْ الجورنالْ / الشاعر أحمد البقيدي

احْسينو مولْ الجورنالْ / الشاعر أحمد البقيدي

احْسينو مولْ الجورنالْ / الشاعر أحمد البقيدي :: تعاليق