حمار الليل / محمد بلغازي

حمار هذا وأشمن حمار
للي ضربنا كاملين
فنص الليل ,,وفعز النهار
ماهو دحش ما هو كيدار
حمار نيت منوض لغبار
هذا بوغطاط سرق حلامنا
طلق سراح الوحوش
الساكنة فالغار
ولينا نسهطو بالليل
ماجايبين خبار
ومللي بوغطاط معانا
نحلمو غير بالنهار
شي حاضي شي
حكاية القط والفار
شحال من واحد فينا
غادي ناعس
وشحال منا ناعس غادي
خدم أ التاعس للناعس
غير سلك ..قضي ..وعدي
هاد الليل طوال وحمارو رافس
وبوغطاط سهران خدام
بحال ديما ,,عادي
أما حسن ؟
يضربك الضو
ولا مول الضو
ولا حمار الليل
أما حسن ؟
يهزك الما
ولا تبقى بلا ما
ولا يهزك بوغطاط
فنص الليل؟
الضرب فيه وفيه
والهزان فيه وفيه
ضربها بنعسة ..حسن ليك
وخللي حمار الليل
يغني يا ليل يا عين
وبوغطاط راكبو
يلبس رجليك
ما تفيق ..ما تعيق
مادير للي عليك
ياك حمار الليل فيك وفيا
غير تلاح من السطاح
ولا عليك..
وأنا تابعك من الدروج
حرام عليا نخليك